భారతీయ వెలుగు ప్రతినిధి హైదరాబాద్
ఫాక్స్కాన్ కంపెనీ విస్తరణ …మరో
60 ఎకరాలు కేటాయింపు….
తెలంగాణలో పెట్టుబడులు పెట్టడానికి ముందుకొచ్చే కంపెనీలకు కావలసిన మౌలిక సదుపాయాలు కల్పించే విషయంలో ఎలాంటి అనుమానాలు అక్కరలేదని ముఖ్యమంత్రి రేవంత్ రెడ్డి స్పష్టం చేశారు. ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబుతో కలిసి హైదరాబాద్ శివారు రంగారెడ్డి జిల్లా కొంగరకలాన్‌లోని ఫాక్స్కాన్ కంపెనీని సందర్శించారు. ఫాక్స్కాన్ ప్రతినిధులతో సమావేశమై FIT KK Park కంపెనీ పురోగతి, ఇతర అంశాలను అడిగి తెలుసుకున్నారు.
ఈ సందర్భంగా ముఖ్యమంత్రి రేవంత్ ఫాక్స్కాన్ ఇంటర్‌కనెక్ట్ టెక్నాలజీ సీఈవో, చైర్మన్ సిడ్నీల్యూతో వీడియో కాన్ఫరెన్స్ ద్వారా మాట్లాడారు. కంపెనీకి కావాల్సిన మౌలిక సదుపాయాల కల్పించడంలో అన్ని విధాలుగా సహకరిస్తామని మరోసారి భరోసా ఇచ్చారు. కంపెనీ విస్తరణలో భాగంగా తెలంగాణలో మరిన్ని విభాగాల్లో పెట్టుబడులకు ఫాక్స్కాన్ ముందుకు రావాలని సీఎం కోరారు. ముఖ్యంగా ఎలక్ట్రిక్, లిథియం బ్యాటరీ విభాగాల్లోనూ రాష్ట్రంలో పెట్టుబడులు పెట్టాలని విజ్ఞప్తి చేశారు.
సీఎం విజ్ఞప్తి మేరకు ఫాక్స్కాన్ తెలంగాణలో తమ కార్యకలాపాలను విస్తరించడానికి గ్రీన్ సిగ్నల్ ఇచ్చింది. ఈ సంస్థ ఇప్పటికే కొంగర కలాన్‌లో 120 ఎకరాల్లో ఉత్పత్తుల ప్రారంభం వైపు అడుగులేస్తుండగా.. మరో 60 ఎకరాల్లో సంస్థను విస్తరించేందుకు సిద్ధమైంది. సంస్థ ఉత్పత్తులను నవంబరులోనే ప్రారంభించడానికి పూర్తిస్థాయిలో ఏర్పాట్లు చేస్తున్నామని సంస్థ ప్రతినిధులు తాజాగా వెల్లడించారు. కొన్ని అత్యాధునిక పరికరాలను చైనా నుంచి దిగుమతి చేస్తున్నట్లు చెప్పారు. వాటికి కస్టమ్స్‌ శాఖతో ఇబ్బందులు ఉత్పన్నం అవుతున్నాయని సీఎం దృష్టికి తీసుకొచ్చారు. చైనా నుంచి హైదరాబాద్‌కు రావాల్సిన కొందరు సాంకేతిక నిపుణులకు వీసాలు లభించడంలో తీవ్ర సమస్యలు ఎదురవుతున్నాయన్నారు.
కంపెనీ ఎదుర్కొంటున్న సమస్యలను త్వరితగతిన పరిష్కరించాలని సీఎం అధికారులకు ఆదేశించారు. ఫాక్స్కాన్ కంపెనీకి మౌలిక సదుపాయాలను సమకూర్చేందుకు అన్నివిధాలుగా తమ ప్రభుత్వం సహకరిస్తుందని సీఎం రేవంత్ వారికి హామీ ఇచ్చారు. సీఎం రేవంత్ రెడ్డి పర్యటనలో ఎమ్మెల్సీ పట్నం మహేందర్ రెడ్డి, స్థానిక ఎమ్మెల్యే మల్ రెడ్డి రంగారెడ్డి, ప్రభుత్వ ఐటీ విభాగం ఉన్నతాధికారులు, ఫాక్స్కాన్ ప్రతినిధులు తదితరులు పాల్గొన్నారు.
